ढब्बू (सिमला) मिरचीची मसालेदार भाजी (Bell Pepper with Gravy)

अमेरीकेत स्वीट पेपर्स म्हणुन एक प्रकारची मिरची मिळते, ती वापरुन ही भाजी छान होते.

६-७ लाल रंगाचे स्वीट पेपर्स
१ मध्यम कांदा
१-२ लसुण पाकळ्या
१ मुठभर दाणे भाजलेले
१/२ मुठ तीळ भाजलेले
१/२ मुठ सुके खोबरे भाजलेले
छोट्या लिंबाएवढी चिंच पाण्यात कोळुन
गुळाचा छोटा तुकडा
कांदा लसुण मसाला (गरम किंवा गोडा मसाला आणि लाल तिखट वापरले तरी चालते), मीठ चवीप्रमाणे
Dhabu Mirachichi Bhaji

कृती -
मिरचीचे दांडे १/२ कापून भरल्या मिरचीसारखे ४ भाग करुन मिरच्या कापुन ठेवाव्यात. किंवा मिरचीला slit देवून बाजुला ठेवाव्यात.
कांदा मोठा मोठा चिरुन तेलावर परतावा. त्यातच भाजलेले हळद, लसुण पाकळी, दाणे, तीळ, खोबरे घालुन थोडे परतावे, जरा थंड झाले की मिक्सरमधुन बारीक वाटून घ्यावे. मसाला, मीठ, गुळ वाटणात घातले तरी चालते. आवडत असेल तर थोडी कोथींबीरही घालावी.
आता जड बुडाच्या कढईत तेल तापवुन नेहेमीप्रमाणे फ़ोडणी द्यावी त्यात मिरच्या घालुन परताव्यात. नीट परतून झाले की मग वाटलेला मसाला घालुन चिंचेचा कोळ घालून थोडे पाणी घालुन झाकण लावावे, मिरच्या नीट शिजु द्याव्यात. वरुन कोथींबीर घालुन गरम गरम पोळी बरोबर खावे.

टीप - स्वीट पेपर्स जर मिळत नसतील तर लाल ढबु मिरची घेऊन त्याचे मोठे (१.५ ईंच मोठे) तुकडे करुन ते वापरले तरी ही भाजी छान होते. मिरचीतल्या बिया शक्यतोवर काढुन टाकाव्यात. तीळ अवडत नसतील तर घातले नाहीत तरी चालतात. सुक्या खोबर्याच्या ऐवजी ओले खोबरे घतले तर वेगळी चव येते.