अडाई (Adai)

मी अडाई पहिल्यांदा खाल्ली त्याला बरीच वर्षे झाली. मग अचानक विसरून गेले. मग अचानक एका मैत्रिणीकडे खिसलेले गाजर आणि कोबी घातलेले अडाई खाल्ले टोमॅटोच्या चटणीबरोबर आणि मला ते खूपच आवडले. हे तिला सांगितल्यावर अमचे एकदम साटेलोटे ठरले, मी तिला पालक डाळ करुन द्यायची आणि तिने मला अडाई पीठ करुन द्यायचे. हे वर्षभर नीट चालले पण मग ती देशात निघुन गेली आणि मग तिला माझी पालक डाळ मिळेनाशी झाली आणि मला अडाई. मग रेसिपी एक्स्चेंज झाले मी ब्लॉगवर पालक डाळ तिच्यासाठी लिहिली आणि तिने इमेलमधे मला अडाईची रेसिपी पाठवली :) तर तिची ही मस्त रेसिपी लिहुन ठेवायची तर ब्लॉगवरच का नको? म्हणुन मग मी जरा त२-३ वेळा करुन पहिल्यानंतर लिहितेय -

Adai Rolls
१ भाग हरभरा डाळ (चणा डाळ)
१ भाग मूग डाळ (शक्यतो साल असलेली)
१ भाग उडीद डाळ (शक्यतो साल असलेली)
१ भाग तूर डाळ
१ भाग तांदूळ (मी ब्राउन राईस वापरला)
४ लाल सुक्या मिरच्या
२-३ पाकळ्या लसूण
चवीप्रमाणे मीठ
२ टेबल्स्पून खोबरे (सुके/ओले कोणतेही चालेल)

कृती -
सर्व डाळी आणि तांदूळ नीट निवडून धुवुन पाण्यात कमीतकमी ६-७ भिजत ठेवावे. भिजवतानाच त्यात लाल मिरची आणि लसूण घालावा. ६-७ तासानंतर त्यातले पाणी बाजुला काढुन घ्यावे आणि भिजवलेली धान्ये मिक्सरमधे / फूडप्रोसेसरमधे बारीक करावीत. शक्यतो जितके बारीक करता येईल तितके करावे. त्यात गरज लागेल तसे ते धान्य भिजवलेले पाणीच घालावे. शेवटी मीठ आणि खोबरे घालावे. पीठची कन्सिस्टंसी साधारण डोश्याच्या पिठासारखी असते. गरम नॉनस्टिक तव्यावर नेहेमीच्या डोस्यासारखे डोसे करावेत. अडाई नेहेमीच्या डोस्यापेक्षा थोडे जाडसर असतात. चटणीबरोबर खायला द्यावेत.

टीप -
१. अडाई पीठ तयार केल्या केल्या लगेचच करता येतात किंवा पुढे २ दिवसात कधीही करता येतात.
२. पीठ अंबवले नाहीतरी हरकत नाही. पण पीठात खिसलेल्या भाज्या वगैरे घालणार असाल तर मात्र पीठ खुप दिवस ठेवु नये.